ilo pi sike tu
tenpo poka
tenpo poka la mi kepeken ilo pi sike tu lon suno ale. mi tawa ma pi pali mani kepeken ona.
tenpo suno ale la mi tawa ma pi pali mani lon tenpo tu. ma pali li lon poka pi tomo mi. taso mi wile tawa ona la tawa li kepeken tenpo ilo lili luka luka luka.
kepeken ilo pi sike tu la mi ken kama lon tomo pali kepeken tenpo ilo luka taso.
noka mi la tenpo pi tawa mi li tu wan. ilo pi sike tu la tenpo pi tawa mi li wan.
tenpo ale la mi kama lon ilo mi pi sike tu la kalama ni pi toki Nijon li kama lon insa pi lawa mi.
kon ma wawa
tenpo pini la mi wile ala kepeken ilo mi pi sike tu tan ijo ante mute. ijo suli wan li ni: kon ma wawa li kama li ike e tawa mi la ni li ike suli e pilin mi. mi o utala e kon.
taso tenpo pini la mi kepeken nasin pi nasa mute: kon li kama la mi suli e mute pi wawa noka wile. ni li nasa tan ni: kon ma wawa a li suli e mute pi wawa pana wile. ni la mi suli sin e mute pi wawa noka wile la tawa li kama ike mute a. tenpo ni la kon ma wawa li kama la mi sona lili e wawa noka wile. ni la mi ken awen tawa li ken pilin ike ala.
open tawa en pini tawa
ni li nasa lili, taso tenpo pini la mi sona ala open pona e tawa li sona ala pini pona e tawa.
nasin mi pi tenpo pini li ni:
- monsi mi li kama lon supa monsi.
- mi weka e noka tan ma.
- noka mi li alasa e supa noka.
- mi tawa.
mi wile pini la, tenpo pini la mi ni:
- mi pini e tawa kepeken luka mi.
- monsi mi li awen lon supa monsi.
- noka mi li lukin pilin e ma li ken ala ni pona.
taso tenpo ni la mi sona e ni: lon open tawa lon pini tawa la monsi mi o lon ala supa monsi!
nasin pona la open tawa li ni:
- o pana e noka wan tawa supa noka.
- o sewi e ale sijelo o pana e noka ante tawa supa noka ante.
- monsi o kama lon supa monsi.
nasin pona la pini tawa li ni:
- o kama pini e tawa kepeken luka.
- noka wan o awen lon supa noka wan.
- monsi o kama tawa sewi o weka tan supa monsi.
- ale sijelo o tawa sinpin lili.
- noka ante o kama awen lon ma.
- o tawa lipu pini
ko sijelo en weka pi ken mama - o tawa lipu kama
len lawa sin pi weka suno