lipu pi jan Lakuse

moli ala pi jan lili Wilonsa

mi kama toki e ijo pi tenpo pini

lon lipu ni la toki ale ni li lon tenpo pini. jan pi toki mi li sijelo pona. ale li pona.

jan lili Wilonsa li kama lon

jan lili sin li lon jan sama pi mama mi. ona li jan sin. sama jan sin ale la ona li suwi mute.

taso sijelo ona li pakala.

tenpo li tawa. open la, ijo nasa li kama. jan ale o pana e ko jaki pimeja tan monsi ona. taso jan lili Wilonsa la ko ona li pimeja ala li walo.

tenpo li tawa. selo pi jan lili Wilonsa li kama jelo mute.

tenpo li tawa. jan lili Wilonsa li kama ala pali e ijo lon tenpo sama jan lili ante.

jan sona sijelo li alasa e ike lon sijelo pi jan lili Wilonsa. ona li kama lukin e pakala.

pakala pi jan lili Wilonsa

ilo mute li lon insa sijelo jan.

ilo wan li esun e kon insa e kon weka.

ilo ante li poki e moku li pakala e ona kepeken telo pakala mute.

ilo ante li weka e telo tan moku li pali e ko jaki.

ilo ante li pali e telo jelo.

ni ale li pakala ala lon jan lili Wilonsa. jan lili Wilonsa la ilo pi pali ni li pakala: ona li weka e jaki tan telo loje li pali e telo pakala e telo pona ante mute.

ilo ni pi jan lili Wilonsa li pakala ale. jan lli Wilonsa li wile e ilo sin.

ilo sin li ken kama tan seme?

jan pi sona sijelo li sona e ijo mute. taso ona li ken ala pali e ilo sin tan ala.

jan lili Wilonsa li wile e ilo sin la ilo ni o kama tan jan ante.

nasin pana li tu:

ilo mute la jan moli taso a li ken pana. taso ilo sin wile pi jan lili Wilonsa la jan sona wawa li ken tu e ilo pi jan pana li ken pana e kipisi wan tawa jan wile. jan pana li jo e kipisi wan taso pi ilo suli ni la ona li moli ala.

jan Wilonsa li kama poka moli

jan lili Wilonsa taso ala li wile e ilo sin. jan ante mute li wile e ona. jan lili Wilonsa o awen. taso sijelo pi jan lili Wilonsa li ken ala ken? jan lili Wilonsa en kulupu ona li kama tawa ma ante tan ni: jan sona wawa li lon ma pi mani mute pi wawa suli. ale li kama toki sama ni: ken suli la jan lili Wilonsa li kama moli.

mama tu ona o lon poka ona lon tenpo ale. ona li sona ala e ni: tenpo seme la jan lili ona li kama moli. tenpo seme la ilo sin li kama ken tawa jan lili ona. jan ale li pilin ike. ale li wile e ni: ilo sin li tawa ona lon tenpo pona.

ilo sin li tawa jan Wilonsa tan seme?

tenpo suno wan la, mama li toki tawa mi e ni: jan Wilonsa li kama jo e ilo sin.

mi toki tawa mama mi e ni: a, jan seme moli li pana e ona?

mama li toki e ijo pi nasa mute tawa mi: jan moli ala li pana. jan pi moli ala li pana. mi sona ala e ni: jan ni pi moli ala li seme.

mi pilin pona mute tan ni: ken suli la ilo sin li ken weka e jan lili Wilonsa tan moli. taso tenpo sama la mi pilin pi nasa sewi. tenpo mute ala la jan pi moli ala li pana. tenpo mute ala a la jan pi moli ala li pana li len e sona pi nimi ona.

tan seme la jan li pana?

tenpo sama la lon ma poka la kulupu mama ante li lon. mama li pana e jan lili tu lon tenpo sama. ona tu li kama ike sijelo. ona tu li wile e ilo sin, sama jan lili Wilonsa. mama li ken pana e ilo sin tawa jan lili wan. taso ona li ken ala pana e ilo sin tawa jan lili tu. kulupu ni pi jan lili tu li toki e pilin ike ona tawa kulupu suli. jan mute li kama sona e pakala li kama sona e ni: ona pi moli ala li ken pana e pona tawa kulupu ni.

lon tomo pi pona sijelo la jan mute mute li kama li toki e wile ni: mi wile pana e kipisi lili pi ilo pona mi tawa jan pi ilo ike.

tan ni la jan lili Wilonsa pi kama moli li kama jan lili Wilonsa pi moli ala.

tenpo ni

tenpo ni la jan lili Wilonsa li pilin pona. lawa ona en nasin ona li nasa lili. (o sona: tenpo suli la jan lili Wilonsa li toki uta ala). taso tenpo ni la ona li tawa tomo sona li musi lon jan pona li sama jan lili ante ale lon nasin mute.

mama ona li pilin wawa e lon pi nasin sewi. mama ona li pilin wawa e ni: pana sewi taso li weka e jan lili Wilonsa tan moli.

mi pilin e ni: pona kulupu li weka e jan lili Wilonsa tan moli. kulupu pi jan lili pakala tu li toki e wile pali la kulupu li kute e wile pali li lukin pana e pilin pona.

sina kin li ken pana e pona

sijelo moli sina li ken kama pana e pona mute tawa jan ante. mi la ale o toki e ni: sijelo ona li ken tawa jan pi sijelo pakala. jan mute li wile e ilo sin. ona mute li kama ala jo e ilo sin li kama moli. ni ale o kama ante a.