mama mije pi mama meli mi
toki
sina toki Inli ala. mi toki Inli taso. toki mi sina li pona ala.
mi sitelen insa e sina la mi lukin e supa lape. sina lon ona. mi kama lon toki. mi toki tawa sina: 'toki.' sina toki ala. mi ken ala toki. sina lon supa lape. selo sina li jelo pimeja tan ike sijelo. ken sina sona li lili. sina mu jaki mute tan uta.
moli
tenpo seme la sina moli? tan tenpo pi moli sina la mi awen sona e ijo pi mute lili. kasi suwi walo. sina pi tawa ala. tomo sijelo pi kon nena nasa. weka. pimeja. poki. anpa.
tenpo
mi toki tawa mama meli e ni: sina lili la mama mije sina li sama seme?
tan toki pi mama meli mi la mi sona e ni:
sina pali mute. sina pali mute a. sina sona pali e moku pona. sina pali lon tenpo ale. sina lape lon tenpo suno li pali lon tenpo pimeja. sina lawa e tomo moku sina. sina pali e moku.
sina kalama mute ala. sina toki mute ala tawa jan ante.
sina wile pona.
tenpo wan la, mama meli lili mi li toki tawa sina e ni: jan li seli e palisa pi kon pimeja la ni li sama seme? mama meli mi li lili. sina pana tawa ona e palisa pi kon pimeja. ona li moku li pilin e jaki. ona li moku ni wan taso li moku sin ala lon ale pi tenpo ona.
tenpo wan la, mama meli mi li lawa e tomo tawa. sina lon poka ona. tan ala la tomo tawa ante li kama pi tawa monsi li utala e tomo tawa. tomo tawa li pakala. taso sina kalama suli ala. sina toki utala ala tawa mama meli mi.
weka
ni ale li sona mi.
sina kama tan ma lili Kanton pi ma Sonko li alasa e jan olin pi ma Onkon la, tan seme la mama mama meli mi li pona tawa sina? mi ken ala sona. mi sona ala e sina.
sina kama ala kama suli lon ma Kanata? ni kin la mi sona ala.
mi sona ala pi toki ala. mama mama meli kin la toki li ken ala.
- o tawa lipu pini
moli ala pi jan lili Wilonsa - o tawa lipu kama
pali moku