lipu pi jan Lakuse

pali moku

nasin mi pi tenpo suli

tenpo suli la mi pali ala e moku. mi sona ala pali e moku. mi ken ala pali moku. mi pali moku ala.

ni li nasa lili. jan lili meli mute li kama sona pali e moku. mi kama ala ni.

sike suno LLTW li lon mi la tomo sona li pana e 'sona pi nasin lon.' jan sona li toki e nasin mute ni:

kulupu pi 'nasin lon' la ni li sona nanpa wan mi pi pali moku. kulupu pi 'nasin lon' li pana e sona lili pi pali moku tawa mi.

taso mi sona e ni: mi ken ala kepeken sona ni pi pali moku. nasin pi pali moku li nasin pali pi mama mi ala.

mama li pana pona ala e nasin pi pali moku

mama mi li monsuta lili. monsuta suli ala. mi pilin ala e ni: mi pali pakala la mama mi li kama pakala e sijelo mi.

taso lon la mama mi li wile e ni: mi pali e ijo lon lukin ona la mi o kepeken nasin pona ona. mi pali e ijo kepeken nasin pi mama mi ala la ona li ken toki kalama suli, li ken weka e pali tan mi li ken kama pali sin e ona e ijo kepeken nasin ona. ona li wile lawa e mi tawa ni: nasin pali mi li sama ale tawa nasin pali ona.

taso mama li toki ala e nasin pali pona. ona li pilin e ni: mi o sona taso.

ni la mi wile ala pali e ijo mute lon lukin pi mama mi. mi sona e ni: mi pali lon lukin ona, la mama li kama kalama suli utala monsuta. mama mi li lon weka tomo la mi pilin sama ni: mi ken pali e ijo. taso ona li lon poka la mi pilin e ni lon tenpo mute: mi ken ala a pali e ijo.

lon pali moku taso ala la mama mi li anpa e mi lon nasin ni. mama li lukin e pali mi la mi ken ala weka e jaki tan ijo. mi ken ala pona e supa noka e ilo moku e tomo. mi ken ala pana e telo tawa kasi. mi ken ala pali e moku. lon lukin pi mama mi la mi kama jan pi ken ala.

tenpo suli la nasin ni li lon li suli li awen. seme a li kama ante?

mi kama sona weka e mama

open la mi pali e moku lon tenpo ni taso: mama mi li lukin ala. mi kama sona tan sitelen tawa pi ilo Jutu. mi kama sona e nasin moku mute pi kulupu ma mama mi. taso mi kama ala sona e ni tan mama mi. mi ken ala. lon poka ona la mi kama ken ala.

mi pali e moku la ni li sama pali len. mi pali len e ijo lon weka pi mama mi. mama mi li wile e ni lon tenpo ale: mi pali e ijo kepeken nasin ona len. ni la mi kin li len e pali mi. esun pona.

lon weka pi lukin mama la mi kama pona e ken pi pali moku. mi kama sona kepeken ilo moku mute. mi kama kepeken nasin seli ante mute.

moku mi li kama pona tawa uta. mi awen pali lon weka pi mama mi. taso tenpo la mi toki e ni tawa ona: mama o. mi pali e moku. o moku e ona.

mi kama e sona ni lon mama mi: moku mi li ike ala.

mi awen weka e mama

mama mi li sona e pona uta pi moku mi la mi kama kepeken nasin ante. mi awen kepeken nasin ni. ona li nasin mi pi tenpo ni.

ken la mi wile pali e moku, taso mama li lon pok. ni la mi pana e kalama musi wawa tawa kute mi kepeken ilo kute lili. mi pali sama ni: mama li lon ala. mi toki tawa mama mi e ni: mi lon ala. sijelo mi li lon, taso kon mi li lon ma ante. o toki ala tawa mi lon nasin mi pi pali moku.

nasa mute tawa mi la mama li kute e ni. lon la ona kin li pali sama ni: mi lon ala. ona li lukin ala e pali mi. ken suli la ona li sona e ni: ona li lukin la ona li kama pilin ike li kama wile toki.

mama mi li wile lawa mute. ni li tan seme? mama mi li jan lili la ona li ken ala lawa mute. ona li anpa mute tawa mama ona.

mama tu pi mama mi li lawa e tomo moku mani pi ma Sonko. tenpo sike tu wan li lon mama mi la mama mi li pali lon tomo moku pi kulupu mama ona.

tenpo sike tu wan. tu wan. tu wan. ni li lili mute.

ni la mi pilin utala ike ala tawa mama mi. taso awen la mi wile weka e ona lon tomo pi pali moku tan ni: ona li pana tawa mi e pilin pi ken ala e pilin anpa e pilin ike.

tenpo kama

mi wile ken pali e moku lon poka pi mama mi lon weka ona ala.